Ríkisstjórnin vanrækir eigin Evrópustefnu

Ný samningsbrotamál gegn íslenska ríkinu vegna vanrækslu við innleiðingu tilskipana sýnir að ríkisstjórnin fylgir ekki eigin Evrópustefnu. 

ESA, Eftirlitsstofnun EFTA, ákvað í dag að vísa tveimur samningsbrotamálum gegn Íslandi til EFTA-dómstólsins þar sem Ísland hefur látið undir höfuð leggjast að innleiða tilskipun um réttindi neytenda í landsrétt sinn og tilskipun um endurheimt bensíngufu.

Auk þessara tveggja mála gegn Íslandi ákvað ESA í dag að vísa einu samningsbrotamáli gegn Liechtenstein til EFTA-dómstólsins en stofnunin greindi frá þessu á vef sínum í dag.

Bæði Ísland og Liechtenstein hafa látið undir höfuð leggjast að innleiða tilskipun um réttindi neytenda í landsrétt sinn. Tilskipunin er milvægur hluti af umfangsmiklum reglum sem er ætlað að tryggja rétt neytenda hvarvetna á Evrópska efnahagssvæðinu (EES) og stuðla þannig að virkum innri markaði. Ríkjunum bar að innleiða tilskipunina fyrir 1. febrúar 2014.

Hitt samningsbrotamálið gegn Íslandi snýr að því að íslenska ríkið hefur ekki heldur innleitt tilskipun um endurheimt bensíngufu. Markmiðið með tilskipuninni er að bæta loftgæði með því að draga úr losun bensíngufu út í andrúmsloftið. Íslandi bar að innleiða tilskipunina fyrir 1. febrúar 2014.

Vísun máls til EFTA-dómstólsins er lokaskrefið í formlegu samningsbrotamáli áhendur EFTA-ríki.vÁður hafði Ísland verið upplýst um afstöðu ESA og gefinn kostur á að koma á framfæri röksemdum sínum sem og að ljúka málinu með því að innleiða viðeigandi löggjöf. Það var hins vegar ekki gert. 

Þegar þessi tvö samningsbrotamál bætast við hefur ESA höfðað ellefu samningsbrotamál á hendur íslenska ríkinu vegna tafa á innleiðingu EES-reglna á aðeins einu ári.

Þessi vinnubrögð eru algjörlega á skjön við Evrópustefnu ríkisstjórnarinnar sem var birt og kynnt opinberlega hinn 11. mars í fyrra en þar segir orðrétt að „ á árinu 2014 verði upptöku gerða í EES-samninginn hraðað umtalsvert“ 

Þar segir jafnframt: „Eigi síðar en á fyrri hluta árs 2015 verði innleiðingarhalli EES gerða orðinn undir 1%.“ og „á sama tíma verði ekkert dómsmál fyrir EFTA dómstólnum vegna skorts áinnleiðingu EES gerða.“

Í ljósi tíðinda dagsins er ljóst að ríkisstjórnin er órafjarri því að ná þessum markmiðum.