Lögreglumenn réðust gegn mótmælendum

Lögreglan í Mjanmar beitti kylfum gegn stúdentum sem hafa mótmælt lagabreytingum þar í landi um frá því í janúar. Mótmælendurnir reyndu að brjóta sér leið í gegnum vegatálma lögreglunnar, sem höfðu heft mótmælagöngu þeirra í nokkra daga.

Viðræður milli mótmælenda og lögreglu höfðu staðið yfir og í morgun var tilkynnt um að samkomulag hefði náðst. Mótmælendur áttu að fá að halda göngu sinni áfram til fyrrverandi höfuðborgarinnar Yangon, sem er í um 140 kílómetra fjarlægð frá Letpadan, þar sem til átaka kom.

Samkvæmt BBC reiddust mótmælendur þegar lögreglan bannaði þeim að halda fánum á lofti og syngja. Þá reyndu um 200 stúdentar að brjóta sér leið í gegnum vegtálma lögreglunnar.

Mótmælendurnir vilja fá í gegn breytingar á lagafrumvarpi sem þeir segja að muni leiða til þess að auðvelt væri að miðstýra menntun í landinu. Þeir vilja að menntastofnannir fái meira vald til að setja eigin stefnu. Þá vilja þeir að leyfilegt verði að stofna stúdentasamtök.