Keown: Ég hata ekki United en spilamennska liðsins er ömurleg

Eins og aðrir sparkspekingar í Bretlandi hefur Martin Keown, fyrrverandi varnarmaður gullaldarliðs Arsenal, verið duglegur að gagnrýna Manchester United.

Þrátt fyrir að lærisveinar Louis van Gaal séu í þriðja sæti úrvalsdeildarinnar hefur fótboltinn sem liðið spilar verið harðlega gagnrýndur og sumir stjörnuleikmenn liðsins réttilega sagðir vera að spila langt undir getu.

Keown svarar reglulega spurningum um ensku úrvalsdeildina á vefsíðu Daily Mail, en um daginn fóru hann og Jamie Redknapp yfir sex atriði sem eru að hjá Manchester United.

Keown hefur aldrei verið í neinu uppáhaldi hjá stuðningsmönnum Manchester United, sérstaklega ekki eftir atvikið á Old Trafford í apríl 2003 þegar Ruud van Nistelrooy brenndi af vítaspyrnu á lokamínútum leiksins.

Miðvörðurinn var þá fljótur til að stökkva á hollenska framherjann, slá hann í öxlina og öskra framan í hann. Var það eitt af fjölmörgum atvikum sem komu upp á milli þessara erkifjenda á þeim tíma.

Keown svaraði spurningum lesenda Daily Mail í gær og þar vildi einn stuðningsmaður Manchester United vita hvort hann hataði United. Keown átti að hafa verið svo harðorður í garð Van Gaal eftir bikarsigurinn á Preston.

„Það er algjört kjaftæði,“ segir Keown. „Ef þú horfðir á frammistöðu liðsins þá var það langt frá því að líkjast því sem við þekkjum hjá Manchester United.“

„United hefur sjálft sett viðmiðið mjög hátt og þegar ég horfi á liðið í dag er eitthvað annað í gangi. Það virðist sem svo að stjórinn viti ekki alveg hvað hann er að gera og flæki hlutina um of.“

„Hann virðist ekki vita hvert hans besta lið sé eða hver sé besta uppstillingin. Það er pirrandi hvort sem þú heldur með Manchester United, Arsenal eða Chelsea. Maður vill að United spili eftir getu og liðið er ekki að gera það.“

„Það sem ég segi tengist því ekkert hvort ég haldi með Manchester United eða ekki. Ég er stoltur af því að vera eins hlutlaus og ég get þegar ég tala í fjölmiðlum,“ segir Keown.

Paul Scholes, goðsögn í lifanda lífi hjá Manchester United, hefur einnig gagnrýnt spilamennsku sinna gömlu félaga og sagði um daginn fótboltann sem liðið spilar vera ömurlegan.

Beðinn um að draga orð Scholes saman í eitt orð svaraði Keown: „Sammála.“