Podolski segir frétt í The Mirror uppspuna frá rótum

Lukas Podolski segir ekkert hæft í frétt sem birtist nýlega í The Mirror þess efnis að hann hafi farið í fússi af æfingasvæði Arsenal.

Podolski hefur verið orðaður við Inter á Ítalíu en Arsene Wenger, stjóri liðsins, sagði á blaðamannafundi að það væri ekkert hæft í þeim fregnum og að hann vildi halda þýska framherjanum hjá Arsenal.

Hann var ekki með í leiknum gegn Southampton í dag en sagði að frétt um meinta óánægju sína algjöran uppspuna frá rótum. „Mér finnst ótrúlegt að dagblöðum sé leyft að birta lygar til að ná athygli fólks,“ skrifaði Podolski á Twitter-síðu sína eins og lesa má hér fyrir neðan.

Podolski segist hafa verið í meðhöndlun hjá læknum félagsins á meðan umrædd æfing átti sér stað og að blaðamenn The Mirror hafi verið of fljótir á sér. „Ég óska samt The Mirror gleðilegs nýs árs og að því gangi betur að búa til réttar fyrirsagnir í framtíðinni.“

#lies #facts #stormgate #poldi pic.twitter.com/BOo7iEhlA7

— Lukas-Podolski.com (@Podolski10) January 1, 2015