Alþjóðasamfélagið sagt hafa brugðist

„Þetta hefur verið skelfilegt ár fyrir þá sem reyna að berjast fyrir mannréttindum og þá sem sitja fastir í hörmungum stríðsátaka,“ segir í nýjustu ársskýrslu mannréttindasamtakanna Amnesty International.

„Við skulum þó vona að á næstu árum, þegar horft er til baka til ársins 2014,“ segir enn fremur, „þá verði litið á það sem við máttum ganga í gegnum á árinu 2014 sem lágpunkt, algjöru lágmarki hafi verið náð og við höfum síðan risið upp úr þessu og skapað okkur betri framtíð.“

Samtökin gagnrýna harðlega voldugustu ríki heims og alþjóðasamfélagið svonefnda, sem hafi brugðist seint og illa við hverju neyðarástandinu á fætur öðru.

Fastaríkin fimm í Öryggisráði Sameinuðu þjóðanna eru sérstaklega hvött til þess að afsala sér neitunarvaldi sínu í málum sem varða þjóðarmorð, stríðsglæpi og glæpi gegn mannkyni: „Það væri mikilvægt fyrsta skref og myndi bjarga mörgum mannslífum,“ segir í skýrslunni.

Grimmileg átök víða um heim hafa ekki aðeins kostað fjölda mannslífa heldur hrakið fólk frá heimilum sínum, þannig að flóttamannavandinn hafi aldrei verið meiri. Þar á stríðið í Sýrlandi stærstan þátt, því fjórar milljónir manna hafa hrakist þaðan á síðustu árum. Flestir flóttamannanna frá Sýrlandi halda til í nágrannaríkjunum, sem flest hver standa sjálf illa efnahagslega. Auðugu löndin í Evrópu og víðar eru hins vegar gagnrýnd fyrir að neita að taka á sig sanngjarnan hluta vandans.

„Það er viðbjóðslegt að sjá að auðugu löndin leggi alla áherslu á að halda fólki úti frekar en að hjálpa því að lifa,“ segir í skýrslunni.

Salil Shetty, framkvæmdastjóri Amnesty International, gagnrýnir valdamenn heims einnig fyrir að huga ekki að vernd almennra borgara, sem eigi þó að vera algert forgangsatriði þegar átök brjótast út. Alþjóðalög séu afskaplega skýr um það að árásir megi aldrei beinast að almennum borgurum: „Reglan um að greina á milli almennra borgara og bardagafólks er grundvallartrygging gegn því að fólk lendi í hryllingi styrjalda,“ segir hann.

„Og samt gerist það aftur og aftur að almennir borgarar lenda í eldlínu átakanna.“