Græddu milljónir á flóttamönnunum

Talið er að flóttamennirnir sem voru um borð í flutningaskipinu Ezadeen hafi greitt allt upp undir 8.000 dollara fyrir að komast um borð í skipið. Það er um ein milljón íslenskra króna.

Ítölsk lögregluyfirvöld telja að hver flóttamaður hafi þurft að greiða á bilinu 4.000-8.000 dollara og hafa smyglararnir því þénað um 3 milljónir dala. Það gera tæplega 400 milljónir króna.

Skipið var dregið inn til hafnar í ítölsku borginni Corigliano Calabro í gær af Tý, skipi Landhelgisgæslunnar. 360 manns var bjargað af skipinu sem sigldi undir síerraleónskum fána.

Ástand flóttamannanna er sagt gott og er nú verið að flytja þá í innflytjendamiðstöðvar og á heimili víðs vegar um Ítalíu.