Schweinsteiger: Við getum unnið titla með þetta lið

Bastian Schweinsteiger, einn af nýjustu leikmönnum Manchester United, telur liðið vera nógu gott til að vinna titla á komandi leiktíð.

Schweinsteiger yfirgaf Bayern München fyrr í mánuðinum og gekk í raðir Manchester United, en hann vann allt sem hægt er að vinna með Bæjaraliðinu.

„Ég verð að segja að gæðin í þessu liði eru rosaleg,“ segir hann í viðtali á heimasíðu Manchester United.

„Ég er viss um, að með þetta lið, er mögulegt að vinna titla og eftir að hafa verið hérna í viku treysti ég mér til að segja það.“

Schweinsteiger spilaði sinn fyrsta leik fyrir Manchester United um helgina þegar liðið vann Club America í ICC-bikarnum en í nótt mætir það San Jose Earthquakes.

„Við erum með góða vörn og frábæra leikmenn sem geta skipt máli í stórleikjum. Það eru líka leikmenn sem eiga eftir að koma inn í þetta þannig möguleikarnir fyrir þetta lið eru miklir,“ segir Bastian Schweinsteiger.