Kane: Ég verð klár í fyrsta leik með Tottenham

Harry Kane, framherji enska úrvalsdeildarliðsins Tottenham, lofar stuðningsmönnum liðsins því að hann verður klár í slaginn gegn Manchester United í fyrsta leik.

Kane mætti seinna til æfinga en aðrir leikmenn Tottenham þar sem hann fékk lengra frí vegna þátttöku sinnar á EM U21 árs landsliða með Englandi.

Framherjinn ungi sló í gegn á síðustu leiktíð og skoraði 21 mark í deildinni er Tottenham-liðið undir stjórn Mauricio Pochettino endaði í fimmta sæti.

„Ég tel að ég missi ekki af fyrstu leikjunum. Það er meira en nógur tími fyrir mig að verða klár,“ segir Kane í viðtali við heimasíðu enska knattspyrnusambandsins.

„Þó ég hafi verið lengur í burtu snerist það ekki um líkamleg vandamál. Stundum þarf maður bara smá hvíld til að koma sér í gang andlega líka,“ segir hann.

„Ég hélt mér í formi, það er ekki eins og ég hafi verið að leyfa mér einhverja hluti. Ég verð klár í fyrsta leik. Það er alveg klárt,“ segir Harry Kane.