Næsta stórstjarna fótboltans spilar með Manchester United

Hið virta franska fótboltablað France Football hefur tekið saman fimmtíu manna lista yfir þá leikmenn sem verða bestu knattspyrnumenn heims eftir fimm ár eða árið 2020.

Efstur á lista hjá Frökkunum er hollenski landsliðsmaðurinn Memphis Depay sem Manchester United keypti frá PSV Eindhoven í sumar. Depay er 21 árs gamall og verður því 26 ára gamall þegar Evrópumótið fer fram 2020.

Memphis Depay fór á kostum á síðustu leiktíð og hjálpaði PSV Eindhoven að vinna fyrsta hollenska meistaratitil félagsins í sjö ár. Depay skoraði fjölda marka beint úr aukaspyrnum en hann var alls með 22 mörk og 6 stoðsendingar í 30 leikjum.

Næstu menn á listanum eru síðan Marquinhos, miðvörður PSG, (2. sæti) 49 milljón punda maðurinn Raheem Sterling hjá Manchester City (3. sæti), Chelsea-maðurinn Kurt Zouma (4. sæti), Max Meyer hjá Schalke 04 (5. sæti) og Munir El Haddadi hjá Barcelona (6. sæti).

Í sjöunda sætinu er síðan Norðmaðurinn Martin Ødegaard sem spilar nú með spænska stórliðinu Real Madrid og fær væntanlega einhver tækifæri á næsta tímabili.

Aðrir á listanum eru menn eins og Króatinn Alen Halilovic hjá Barcelona, Ross Barkley hjá Everton, Emre Can og Jordan Ibe hjá Liverpool, Daninn Pierre-Émile Højberg hjá Bayern München og Manchester United leikmennirnir Luke Shaw og Adnan Januzaj.

Enginn íslenskur knattspyrnumaður kemst á þennan lista France Football.