Chicharito fær tækifæri til að sanna sig hjá Man Utd

Javier „Chicharito“ Hernández fær tækifæri til að endurvekja ferill sinn hjá Manchester United.

Mexíkóinn lék aðeins tvo keppnisleiki með United á síðasta tímabili áður en hann var lánaður til Real Madrid.

Hinn 27 ára gamli Chicharito skoraði níu mörk í 33 leikjum fyrir Real Madrid en hann fékk fá tækifæri í byrjunarliði spænska stórveldisins.

United-liðið er þunnskipað í framherjastöðunum og því fær Chicharito tækifæri til að sýna sig og sanna í æfinga- og keppnisferð United í Bandaríkjunum.

„Ég lét Chicharito og Danny Welbeck fara í fyrra því við fengum Falcao. En Chicharito er nú kominn aftur,“ sagði van Gaal á blaðamannafundi í Seattle.

Chicharito, líkt og Marcos Rojo og Angel dí María, kemur til móts við United-liðið 25. júlí en hann braut viðbein í leik með mexíkóska landsliðinu gegn Hondúras í Gullbikarnum, álfukeppni Norður- og Mið-Ameríku, þann 1. júlí síðastliðinn.