Rök mæla með endurupptöku í Geirfinns-málinu

Rök eru fyrir endurupptöku þriggja manna sem áttu aðild í Guðmundar- og Geirfinnsmálinu. Davíð Þór Björgvinsson, settur ríkissaksóknari, hefur skilað áliti sínu en samkvæmt niðurstöðu hans eru til rök sem mæla með því að mál Sævars Ciesielskis, Tryggva Rúnars Leifssonar og Alberts Klahns Skaftasonar verði tekið upp á nýju. Þetta kemur fram í frétt RÚV.

Áður hafði saksóknari komist að þeirri niðurstöðu að rök mæltu til þess að mál Guðjóns Skarphéðinssonar yrði tekið upp á nýju. Ekki þykja rök til þess að taka mál Erlu Bolladóttur upp á nýjan leik. Málið fer nú fyrir endurupptökunefnd sem ákveður næstu skref í því.

„Þetta er eitt skref í rétt átt,“ segir Guðjón Ólafur Jónsson lögmaður Alberts Klahns Skaftasonar í samtali við Vísi. „Enn er engin niðurstaða komin í hvort málið verði tekið upp á ný og því síður komið að einhverjum málflutningi.“ Aðspurður segir hann að viðbúið sé að niðurstaða endurupptökunefndar liggi í fyrsta lagi fyrir í árslok.

Rúm fjörutíu ár eru síðan síðast sást til Guðmundar Einarssonar og Geirfinns Einarssonar. Sex manns voru dæmdir fyrir aðild sína að málinu. Sævar Ciesielski hlaut sautján ára dóm, Kristján Viðar Viðarsson sextán ár og Tryggvi Rúnar Leifsson þrettán ár. Guðjón Skarphéðinsson hlaut tíu ára dóm, Erla Bolladóttir þrjú ár og Albert Klahns Skaftason eitt ár. Sævar og Tryggvi eru nú látnir.

Ekki náðist í Lúðvík Bergvinsson við vinnslu fréttarinnar en hann fer með málið fyrir hönd Sævars Cieselskis og Tryggva Rúnars Leifssonar.