Björgvin vill taka upp Guðmundar- og Geirfinnsmálin að nýju

Björgvin G. Sigurðsson, þingmaður Samfylkingarinnar, skorar á Ögmund Jónasson innanríkisráðherra að beita sér fyrir því að Guðmundar- og Geirfinnsmálin svokölluðu verði tekin upp að nýju. Eftir að Guðmundur Einarsson og Geirfinnur Einarsson hurfu sporlaust um miðjan áttunda áratuginn voru fjögur ungmenni dæmd í fangelsi. Málsmeðferðinni var allan tímann verulega ábótavant og einn hinna dæmdu, Sævar Ciesielski, krafðist ítrekað endurupptöku málsins. Sævar lést í Kaupmannahöfn á miðvikudaginn.

Björgvin segir þingmenn hafa ýmiss úrræði til að þrýsta á um að málið verði tekið upp aftur. „Ég mun sjálfsagt gera það ef þörf krefur," segir Björgvin. Í pistli sem hann skrifaði á Pressuna í dag hvetur hann innanríkisráðherra til þess að láta til sín taka í málinu. „Við sjáum til hvernig innanríkisráðherra bregst við þessari áskorun minni um að leiða þetta í farveg," segir Björgvin.

„Enn eru margir lifandi og á vettvangi sem voru þátttakendur í þessum harmleik og mikilvægt að endurupptakan fari fram á meðan svo er," segir Björgvin. Hann segist hafa fylgst með málinu frá unglingsaldri og fjallað um það í ræðu og riti og muni gera það áfram. „Oft þarf kannski straumhvörf til að eitthvað gerist og þó að það sé dapurlegt ótímabært andlát Sævars, 56 ára gamals, þá er það samt kannski ákveðin þáttaskil í málinu sem knýr enn á um mikilvægi þess að endurupptakan fari fram. Enda hefur verið sýnt fram á það með ítarlegum rökum í greinargerð Ragnars Aðalsteinssonar að öll rök standa til þess að málið sé tekið upp að nýju," segir Björgvin.