Birkir tekinn af velli eftir klukkutíma í sigri Pescara

Birkir Bjarnason lék tæpan klukkutíma þegar Pescara lagði Brescia að velli með þremur mörkum gegn einu í ítölsku B-deildinni í fótbolta í dag.

Heimamenn í Brescia voru 1-0 yfir í leikhléi, en Pescara skoraði þrjú mörk á síðustu 15 mínútum leiksins og tryggði sér sigurinn.

Þetta var aðeins þriðji sigur Pescara í deildinni í vetur, en liðið er með 13 stig í 17. sæti af 22 liðum.

Birkir fór af velli á 58. mínútu, en hann verður í eldlínunni með íslenska landsliðinu gegn Belgíu og Tékklandi í næstu viku.