Sautján ára strákur gæti varið mark Newcastle um næstu helgi

Alan Pardew, knattspyrnustjóri Newcastle, mun ræða við forráðamenn ensku úrvalsdeildarinnar um þann möguleika að fá leyfi til að fá markvörð að láni fyrir leik liðsins gegn Sunderland á sunnudaginn.

Félagaskiptaglugginn er lokaður, en lið hafa áður fengið undanþágu til að bæta við markverði. Manchester City fékk Marton Fulop á neyðarláni í apríl 2010 þegar Shay Given og Stuart Taylor voru báðir meiddir, en þá var Joe Hart á láni hjá Birmingham.

Tim Krul, aðalmarkvörður Newcastle, er meiddur líkt og varamarkvörðurinn Rob Elliot. Þriðji markvörður liðsins, Jan Alnwick, hefur spilað síðustu þrjá leiki, en hann meiddist á öxl í deildabikarnum gegn Tottenham í gær.

„Það á ekki að vera möguleiki að 17 ára strákur fái að byrja í markinu í úrvalsdeildinni,“ sagði Pardew um hinn kornunga Freddie Woodman sem sat á bekknum hjá Newcastle í gær.

„Alnwick meiddist á öxl og við munum skoða það. Við munum kannski tala við úrvalsdeildina um stöðu hans.“

Ekki er líklegt að þetta gangi í gegn hjá Newcastle þar sem talsmaður úrvalsdeildarinnar sagði í síðustu viku að félagið mætti ekki fá markvörð á neyðarláni þar sem það væri með þrjá heila markverði.

Þar var talað um Alnwick, Woodman og Karl Darlow, sem er á láni hjá Nottingham Forest í B-deildinni. „Aðeins lið með einn heilan markvörð geta nýtt sér þennan möguleika.“

Freddie Woodman, sem er sonur markvarðaþjálfara liðsins, er í U19 ára landsliði Englands og var á láni hjá Hartlepool í byrjun leiktíðar. Hann hefur aldrei spilað fyrir aðallið Newcastle.