Róstur í Ríó de Janeiro

Til blóðugra uppþota kom á götum Rio de Janeiro í Brasilíu í nótt í kjölfar þess að lögreglan skaut ungan dansara til bana, sem hún taldi vera eiturlyfjasala.

Götum á hinu fræga ferðamannasvæði Copacabana var lokað og mótmælendur reistu götuvirki og kveiktu í bíldekkjum. Að sögn yfirvalda lést einn á átökunum sem brutust út og mun hann einnig hafa verið skotinn af lögreglusveitum.

Nú eru aðeins tveir mánuðir í að heimsmeistarakeppnin í fótbolta hefjist í landinu en margir hafa lýst áhyggjum af öryggi gesta keppninnar þar sem uppþot sem þessi hafa verið nokkuð tíð undanfarið.