Valencia biðst afsökunar á rauða spjaldinu

Antonio Valencia, leikmaður Manchester United, bað samherja sína í ekvadorska landsliðinu afsökunar á rauða spjaldinu sem hann fékk í vináttulandsleik liðsins gegn Englandi í Miami í gærkvöldi.

Vængmaðurinn brást ókvæða við þegar Raheem Sterling tæklaði hann hraustlega úti við hliðarlínuna á 79. mínútu. Hann óð í Liverpool-manninn, ýtti við honum og greip snögglega um háls hans.

Báðir fengu rautt, Sterling fyrir tæklinguna og Valencia fyrir viðbrögðin, en leikurinn endaði með jafntefli, 2-2.

„Ég bað liðsfélaga mína afsökunar eftir leikinn sem og þjálfarann. Ég sé eftir þessum slagsmálum við Sterling. Þegar hann tæklaði mig hugsaði ég um SegundoCastillo,“ sagði Valencia eftir leikinn.

Segundo Castillo, samherji Valencia í landsliðinu, var nálægt því að missa af af HM vegna meiðsla í hné sem hann varð fyrir í vináttulandsleik gegn Mexíkó.

„Ég hélt ég myndi missa af HM líka en sem betur fer er í lagi með mig,“ sagði Antonio Valencia.