Hundruð föst neðanjarðar

Nú er ljóst að tvöhundruð og tíu námaverkamenn hið minnsta eru látnir og um áttatíu slasaðir eftir sprengingu sem varð í kolanámu í vesturhluta Tyrklands í gær.

Orkumálaráðherra landsins segir að um 780 manns hafi verið inni í námunni þegar sprengingin varð en svo virðist sem sprengingin hafi orðið þegar bilun kom upp í rafkerfi. Björgunarmenn hafa verið að störfum í alla nótt en mörg hundruð verkamenn eru enn lokaðir inni í námunni. Flestir hinna látnu köfnuðu þegar súrefni rann til þurrðar og segir ráðherrann að nú sé verið að dæla því niður í námuna til þess að freista þess að halda lífi í þeim sem enn eru lokaðir inni.