Tveir drengir slösuðust þegar hoppukastali tók á loft

Tveir drengir, fimm og sex ára, slösuðust alvarlega þegar þeir féllu úr hoppukastala sem tók á loft. Drengirnir voru að leik í kastalanum ásamt 10 ára stúlku þegar hann tók skyndilega á loft. Atvikið átti sér stað í New York í Bandaríkjunum. 

Kastalinn var kominn um fimm metra upp í loftið þegar drengirnir duttu úr honum. Hæst fór kastalinn um fimmtán metra.

Annar drengurinn féll á bifreið og hlaut alvarlega höfuðáverka. Báðir drengirnir hlutu beinbrot. Stúlkan komst hins vegar úr kastalaum áður en hann fór mjög hátt og slasaðist hún aðeins lítillega.

Vitni, Taylor Seymor, hélt í fyrstu að það væri systir hennar sem hún sá detta úr kastalanum enda hafði sú verið að leika sér í kastalanum stuttu áður.

„Fyrst datt eitt barnið úr kastalanum þar sem hann var yfir miðri götunni. Þá fór kastalinn yfir íbúðina mína og þar datt næsta barn og lenti á bílnum mínum,“ sagði Taylor.

Kastalinn lenti loks á íþróttavelli skóla í nágrenninu.