Guðbjörg áfram á bekknum hjá Potsdam

Guðbjörg Gunnarsdóttir sat á varamannabekknum hjá Turbine Potsdam sem vann 2-0 sigur á Bayer 04 Leverkusen í dag í þýsku úrvalsdeild kvenna í fótbolta.

Guðbjörg er búin að vera á bekknum í síðustu fimm leikjum Turbine Potsdam í deild og Meistaradeild en í markinu stendur hin þýska Ann-Katrin Berger.

Guðbjörg stóð síðast í marki Turbine Potsdam í 8-0 sigri á ítalska liðinu Torres í fyrri leik liðanna í átta liða úrslitum Meistaradeildarinnar 23. mars og hélt þá markinu hreinu í fjórða leiknum í röð.

Guðbjörg er því búin að halda markinu hreinu í 442 mínútur en Ann-Katrin Berger er búin að fá á sig fimm mörk í þessum fimm leikjum þar af fjögur þeirra í seinni undanúrslitaleik Meistaradeildarinnar á móti VfL Wolfsburg.

Bernd Schröder, þjálfari Turbine Potsdam, er því með íslenska landsliðsmarkvörðinn út í kuldanum af einhverjum ástæðum en það er ljóst að samkeppnin er hörð hjá þessu öfluga fótboltaliði.

Turbine Potsdam er með jafnmörg stig og topplið FFC Frankfurt en lakari markatölu. Potsdam-liðið á samt leiki inni á FFC Frankfurt.