Guðbjörg hélt hreinu í stórsigri á Hallberu

Guðbjörg Gunnarsdóttir, landsliðsmarkvörður í fótbolta, og stöllur hennar í þýska stórliðinu Potsdam eru komnar með annan fótinn í undanúrslit Meistaradeildarinnar eftir 8-0 sigur á ítalska liðinu Torres á útivelli í dag.

Hallbera Guðný Gísladóttir var í byrjunarliði Torres og spilaði allan leikinn en Ítalirnir áttu ekki roð í Potsdam í dag. Julia Simic skoraði tvö mörk fyrir gestina en fimm aðrar Potsdam-stúlkur komust á blað og þá skoruðu heimakonur eitt sjálfsmark.

Guðbjörg stóð vaktina í marki Potsdam en hún hefur átt mikilli velgengni að fagna síðan hún gekk í raðir liðsins. Hún fékk á sig mark eftir átta mínútur gegn Bayern í fyrsta leiknum sínum fyrir Potsdam en hefur haldið hreinu síðan.

Í heildina hefur Guðbjörg haldið hreinu í þremur síðustu leikjum og 82 síðustu mínúturnar gegn Bayern sem gerir hreint mark í 442 mínútur.