Var að verja kærustuna þegar hann var skotinn

Mikil sorg er nú í Suður-Afríku vegna morðsins á fyrirliða fótboltalandsliðsins, Senzo Meyiwa, en hann var skotinn til bana á heimili sínu í gær.

Nýjustu fréttir af málinu frá lögreglunni á staðnum eru þær að Senzo Meyiwa hafi verið að verja kærustu sína, söngkonuna Kelly Khumalo, þegar hann var skotinn.

Senzo Meyiwa var 27 ára gamall markvörður sem hafði spilað allan sinn feril með liði Orlando Pirates og hafði tekið við fyrirliðabandi landsliðsins í undankeppni Afríkumótsins 2015.

Lögreglan hefur talað við eiginkonu hans Kelly Khumalo og samkvæmt frásögn hennar brutust tveir menn inn á heimili þeirra til að stela verðmætum eins og farsímum, peningum og öðru.

Lögreglan hefur það síðan eftir kærustunni að Senzo hafi verið skotinn í bakið þegar hann stökk til að verja konu sína þegar innbrotsþjófur beindi byssu sinni að henni.  

Hetjuleg framkoma Senzo Meyiwa hafi orðið honum að bana því skotið fór inn í bakið og út um brjóstkassann og hann lést síðan á sjúkrahúsi.

Kelly Khumalo þurfti áfallahjálp eftir hræðilega atburði gærdagsins en lögreglan leitar nú þriggja manna í tengslum við morðið.

Lögreglan hefur lofað Suður-afrísku þjóðinni að finna morðingjana og meðal annars eru í boði  fundarlaun fyrir þá sem geta hjálpað við lausn málsins.