Mennirnir sem fengu reykeitrun í Akrafelli útskrifaðir af spítala

Mennirnir níu sem fengu reykeitrun eftir að hafa unnið við að dæla sjó úr vélarrými á flutningaskipinu Akrafelli eru heilir heilsu og á leið heim af sjúkrahúsinu í Neskaupsstað. Þeir voru fluttir þangað í nótt eftir að flutningaskipið var dregið af strandstað til Eskifjarðar. Flutningaskipið strandaði klukkan fimm í gærmorgun milli Reyðarfjarðar og Fáskrúðsfjarðar. Upphaflega var ákveðið að draga skipið til hafnar í Reyðarfirði en á miðri leið var hætt við það.

Ástæða reykeitrunarinnar er einfaldlega sú að ekki var nægilega vel reykræst úr vélarrýminu þar sem mennirnir unnu en þeir unnu með bensínknúnar loftdælur sem voru búnar að snúa út úr sér loftblæstri.

Vakthafandi læknir segir mennina alla hafa verið með reykeitrunareinkenni en gat ekki gefið upp hvort þeir hefðu verið misvel haldnir. Engum þeirra verður haldið eftir á spítalanum.