Fá innsýn í störf Alþingis

Haldið var upp á það í dag klukkan 11 að tíu þúsundasti nemandinn tekur sæti á Skólaþingi.

Skólaþingi var komið á fót í nóvember 2007. Þar með var komið til móts við áhuga skólafólks á að koma með nemendur í vettvangsferðir á Alþingi. Hver heimsókn tekur um tvær og hálfa klukkustund með stuttu hléi.

Nemendur úr efstu bekkjum 70 grunnskóla hafa nú heimsótt Skólaþing. Þar fara þeir í hlutverkaleik og fylgja í stórum dráttum reglum um starfshætti Alþingis.

Nemendurnir fá tækifæri til að setja sig í spor þingmanna með því að leiða til lykta fyrir fram ákveðin málefni sem fyrir þá eru lögð á þingflokksfundum, nefndarfundum og þingfundum. Jafnframt hlusta þeir á og meta rök sérfræðinga sem kallaðir eru til að veita þingmönnum ráðgjöf og meta rök þeirra.

Þannig eiga þeir að fá innsýn í sambandið milli atburða í samfélaginu, skoðanamyndunar, pólitískra ákvarðana og starfa Alþingis. Síðan eiga þeir að komast að lýðræðislegri niðurstöðu með því að meta rök og álit annarra og taka afstöðu.