Hafna 659 milljóna kröfu World Class

Kópavogsbær hafnar fullyrðingum forsvarsmanna Lauga ehf. um að bærinn sé skaðabótaskyldur gagnvart félaginu með því að framlengja samning við Gym heilsu ehf. um leigu á líkamsræktaraðstöðu við sundlaugar Kópavogs.

Laugar, sem reka World Class-stöðvarnar, tóku þátt í útboði á leigu líkamsræktaraðstöðunnar við sundlaugar Kópavogs. Eftir að útboðið hafði farið fram var að sögn bæjaryfirvalda ákveðið að fresta útboðinu þar til bærinn hefði markað sér lýðheilsustefnu.

„Líkt og fram kemur í bréfi Kópavogsbæjar til þín, dags. 7. október 2014, tók Kópavogsbær ákvörðun um að ganga ekki til samninga við Laugar ehf. í kjölfar útboðsins þar sem talið var að tilboð félagsins uppfyllti ekki kröfur útboðsgagna,“ segir í bréfi bæjarráðs Kópavogs þar sem kröfu Lauga um efndabætur er svarað.

Í kröfubréfi Lauga kemur fram að tilboð félagsins hafi verið hagstæðast en því hafi verið hafnað þar sem endurskoðaðan ársreikning hafi vantað. Þó hefði bærinn ekki gert neinar efnislegar athugasemdir við innihald hans. Ákvörðun bæjarins um að hafna tilboðinu sé ólögmæt og valdi Laugum gríðarlegu tjóni. Krafist sé 659 milljóna króna í bætur.

Bæjarráðið segir að í ljósi ýmissa álitaefna sem upp hafi komið við útboðið hafi bærinn talið að hagsmunir bæjarbúa yrðu best tryggðir ef fyrir lægi skýr stefna um markmið útleigu húsnæðisins áður en ráðist yrði í nýtt útboð. Framlenging uppsagnarfrests leigusamnings við núverandi leigutaka, Gym heilsu ehf., sé aðeins tímabundið úrræði til að tryggja fjárhagslega hagsmuni bæjarins og bæjarbúa þar til húsnæðið verði boðið út á ný. Gym hefur nú samning fram til 1. júní 2016.

„Þar sem ekki náðist að semja um útleigu húsnæðisins í kjölfar útboðsins hefur töluverð óvissa ríkt í viðskiptum núverandi leigutaka [Gym heilsu]. Þar sem leigutekjur Kópavogsbæjar af útleigu húsnæðisins eru tengdar veltu leigutaka hefur slík óvissa töluverð áhrif á tekjur Kópavogsbæjar af húsnæðinu,“ segir bæjarráðið.

Ákvörðun um þessa „skammtímaráðstöfun“ hafi því verið tekin til að forða Kópavogsbæ frá tjóni á meðan unnið sé að því að bjóða húsnæðið fram að nýju í samræmi við lýðheilsustefnu. „Og verður Laugum ehf. líkt og öðrum þá frjálst að bjóða í húsnæðið,“ segir bæjarráðið sem kveður framgöngu sína í málinu vera lögmæta og að „bærinn hafi ekki valdið Laugum tjóni með saknæmum hætti“.

Ármann Kr. Ólafsson bæjarstjóri kveðst ekki vilja tjá sig um málið.