Rússar viðurkenna kosningar í Úkraínu

Úkraína, AP Rússnesk stjórnvöld segjast sátt við kosningarnar í tveimur héruðum austanverðrar Úkraínu, sem uppreisnarmenn þar efndu til um helgina. Nú þurfi stjórnin í Kænugarði að hefja viðræður við leiðtoga uppreisnarmanna í héruðunum tveimur, Luhansk og Donetsk. Sjálfir segja uppreisnarmenn að kosningarnar sýni að aðskilnaður héraðanna tveggja frá Úkraínu sé orðinn að veruleika. „Stjórnin í Kænugarði þarf að sætta sig við að Donbass-svæðið er ekki partur af Úkraínu,“ sagði Roman Ljagin, yfirmaður kjörstjórnar uppreisnarmanna í Donetsk. „Hvort þeir viðurkenna úrslit kosninganna okkar eða ekki er þeirra vandamál.“ Bæði Evrópusambandið og Bandaríkin hafa tekið málstað Úkraínustjórnar í Kænugarði og fordæmt kosningarnar. Þær brjóti þvert gegn vopnahléssamkomulagi, sem Úkraínustjórn gerði við uppreisnarmenn í september.- gb