Reynum að búa til sigurvegara

Eyjólfur Sverrisson og lærisveinar hans bíða spenntir eftir því að dregið verði í umspili um sæti á Evrópumótinu 2015 í Genf í dag. Sama hverjir mótherjarnir verða þá er ljóst að verkefnið verður gríðarlega erfitt en sex þjóðir koma til greina í dag: England, Portúgal, Ítalía, Danmörk, Spánn og Þýskaland.

Strákarnir okkar hafa hins vegar sýnt að þeir óttast engan andstæðing og hafa sýnt getu sína, nú síðast með jafntefli gegn geysisterku liði Frakklands sem í eru leikmenn upp á tugi milljóna evra.

Eyjólfur var vitanlega sáttur eftir að hafa nælt í stig í Frakklandi en fyrri leik liðanna lauk með 4-3 sigri Frakklands í háspennuleik á Laugardalsvelli.

„Okkur grunaði að jafntefli myndi nægja. Við ætluðum að halda í stigið og reyna að taka þrjú stig í lokin, það mátti litlu muna en við erum sáttir með stigið í dag. Við vorum að mæta stjörnum prýddu liði Frakklands og við þurftum að vera fastir fyrir og reyna að loka á þá,“ sagði Eyjólfur en í liði Frakklands voru leikmenn frá Monaco, Arsenal og Chelsea.

Eyjólfur var þjálfari U21 árs liðsins þegar það komst í lokakeppni EM 2011 í Danmörku en hann segir að liðin séu ólík á sinn hátt. „Að mínu mati eru þetta gjörólík lið. Munurinn er helst sá að í dag erum við með líkamlega sterkara lið. Það var meira spil í liðinu árið 2011, við reyndum að spila boltanum hratt eftir jörðinni, en við erum með mun sterkara lið í dag. Við vorum gríðarlega öflugir í föstum leikatriðum í undankeppninni enda öflugir í loftinu,“ sagði Eyjólfur sem sagði að undankeppnin fyrir EM árið 2013 hefði verið góður skóli fyrir liðið. Ísland lenti í neðsta sæti riðilsins í þeirri undankeppni og voru efasemdir um Eyjólf sem þjálfara.

„Það var lærdómsrík undankeppni, við komum beint úr undankeppninni og fengum engan undirbúning fyrir þann hóp. Fyrir vikið fórum við beint í leikina og undirbúningurinn var einfaldlega ekki nægilega góður. Við lærðum mikið af þeirri keppni.“

Margir af leikmönnunum sem hafa gegnt lykilhlutverki í íslenska landsliðinu undanfarin tvö ár voru með U21 árs landsliðinu sem keppti í Danmörku. Eyjólfur segir að þrátt fyrir að góður árangur sé alltaf velkominn þá sé meginhlutverk liðsins enn í dag að undirbúa leikmenn fyrir landsliðið.

„Okkar markmið er auðvitað að búa til leikmenn fyrir landsliðið. Það sem við erum að reyna að innprenta strákunum er sigurvilji, að trúa að þeir séu að fara vinna fyrir alla leiki í stað þess að vona það besta. Við viljum búa til sigurvegara sem fara í leik til þess að ná í stigin þrjú og hafa lausnir til þess,“ sagði Eyjólfur en hann telur að leikmenn íslenska liðsins muni læra af leikjunum í umspilinu og leikjunum á móti Frakklandi.

„Þessir leikir eru gríðarlega mikilvægir fyrir þessa stráka, þetta eru öflug lið og þarf að verjast vel á móti þeim og þeir læra inn á það. Í leiknum skiptum við í 4-4-2 þegar skammt var til leiksloka sem hefur verið helsta leikkerfi íslenska liðsins og þeir brugðust vel við því,“ sagði Eyjólfur sem er í góðu samstarfi við Lars Lagerbäck og Heimi Hallgrímsson, landsliðsþjálfara Íslands.

Þjálfarinn á engan óskamótherja í drættinum.

„Vonandi fáum við útileik fyrst og eigum þá heimaleikinn inni ef þetta fer í framlengingu. Við vitum að þetta verður alltaf gríðarlega erfiður mótherji en við sýndum á móti Frakklandi að við höfum í fullu tré við flesta. Ég ætla ekki að segja að við séum óttalausir, við verðum að vera fullkomlega einbeittir þegar að þessu kemur en vonandi getur óttinn hjálpað okkur,“ sagði Eyjólfur og bætti við að ekkert lið hentaði betur en annað.