Borgið verðtryggð lán með séreignasparnaði

„Það borgar sig í dag fyrir fólk að greiða niður fasteignalán með séreignasparnaði. Skattgreiðendur framtíðarinnar munu hinsvegar borga reikninginn og svo hefur fólk minna til ráðstöfunar á efri árum,“ segir Gylfi Magnússon, lektor við Hásksóla Íslands, um nýtt frumvarp ríkisstjórnarinnar.

Það gerir ráð fyrir að fólk geti annað hvort nýtt séreignasparnað til íbúðakaupa, eigi það ekki húsnæði, eða til að greiða niður lán.



Samkvæmt frumvarpinu verður þak á því hversu háar upphæðir má nota til þessara hluta og er miðað við 1,5 milljónir á þriggja ára tímbabili á heimili, sama hvor leiðin er farin.

Nokkur umræða hefur spunnist um hvort að það borgi sig fyrir fólk að nýta séreignasparnað sinn til þessara hluta.

Gylfi segir að það sé fundið fé að gera það því ekki þurf að greiða skatt af þessum peningum og í sama streng tekur Marías Gestsson aðjúnkt við Háskólann og sérfræðingur hjá Hagfræðistofnun Háskóla Íslands.

„Þar sem fólk greiðir ekki skatt af þessari upphæð má segja að skatturinn sé ávöxtun,“ segir Marías.

„Ef fólk hefur ekki verið að nýta sér séreignasparnaðinn ætti það að fara að gera það. Það er góð ákvörðun. Launþegar leggja fram tvö prósent af tekjum sínum á móti jafnháu framlagi frá atvinnurekandanum,“ segir Gylfi.

Hann segir að það borgi sig alltaf að greiða fasteignalánin, verðbólguskot breyti þar engu um.

„Verðbólguskot auka ekki raunvirði láns heldur fjölgar krónunum sem menn skulda eða greiða í hverjum mánuði á móti kemur að hver króna er minna virði,“ segi Gylfi.

Marías segir að það þó það sé skynsamlegt að nota skattfrjálsan séreignasparnað til að greiða niður lán þá komi það einhversstaðar niður.

„Stjórnvöld verða að hækka skatta í framtíðinni eða að spara í ríkisbúskapnum og það hefur þá væntanlega í för með að ekki verður hægt að eyða jafn miklu í heilbrigðis- og skólakerfi svo dæmi séu tekin,“ segir Marías.

Heildarskuldin vex

Eyjólfur Lárusson framkvæmdastjóri Allianz á Íslandi sagði meðal annars í Fréttablaðinu í gær að verðtryggð lán gætu hækkað á svipstundu og þá væri allt inngreitt þar á meðal séreignasparnaðurinn farinn.



Eyjólfur segir að í tilefni af umræðu, vegna orða hans í blaðinu í gær vilji hann koma því á framfæri, talandi mannamál, að miðað við meðalverðbólgu síðastliðinna ára þá hefur heildarskuld á verðtryggðu láni vaxið upp í upphaflega stöðu þrátt fyrir að greitt hafi verið samviskusamlega í 5 ár. 



„Ég held að hinn almenni Íslendingur sem hefur verðtryggt lán hafi fundið þetta á eigin skinni,“ segir hann.

Jafnframt kvaðst Eyjólfur hvetja alla til að skoða sína stöðu og vega og meta sín mál út frá sínum eigin hagsmunum.