Vilja grafa Ríkharð III. í York

Fjarskyldir ættingjar Ríkharðs III., fyrrverandi Englandskonungs, hófu í gær baráttu fyrir hæstarétti um hvar eigi að grafa hann á nýjan leik.

Jarðneskar leifar Ríkharðs, sem var drepinn í orrustu árið 1485, fundust undir bílastæði í borginni Leicester árið 2012.

Stjórnvöld hafa veitt dómkirkjunni í Leicester í Mið-Englandi leyfi til að grafa konunginn í borginni en ættingjar hans vilja að hann verði grafinn í borginni York, sem er í norðurhluta Englands. Þeir segja að stjórnvöld hafi ekki tekið nógu vel til greina óskir Ríkharðs eða afkomanda hans um hvar gröf hans skuli vera.