CIA upp á kant við þingnefnd

Í vikunni kom upp á yfirborðið djúpstæður ágreiningur milli bandarísku leyniþjónustunnar CIA og þingnefndar, sem hefur undanfarin ár verið að rannsaka pyntingar á föngum í haldi leyniþjónustunnar.

Dianne Feinstein, formaður leyniþjónustunefndar öldungadeildar Bandaríkjaþings, sakar leyniþjónustuna um að hafa njósnað um þingmenn nefndarinnar.

Leyniþjónustan sakar nefndina á móti um að hafa brotið lög þegar hún komst yfir skjöl, sem hún átti aldrei að fá aðgang að.

Nefndin hefur skrifað 6.300 blaðsíðna skýrslu um pyntingastarfsemi leyniþjónustunnar. Skýrslan hefur ekki verið birt opinberlega, en meðal annars er þar fjallað um vatnspyntingar, barsmíðar og aðrar misþyrmingar sem menn, grunaðir um hryðjuverkastarfsemi, máttu sæta í leynifangelsum bandarísku leyniþjónustunnar víða um heim.

John Brennan, yfirmaður CIA, segir margvíslegar rangfærslur að finna í skýrslunni. Feinstein segir hins vegar að skjölin umdeildu, sem komin eru frá Leon Panetta, fyrrverandi yfirmanni CIA, staðfesti það sem fram kemur í skýrslunni.