Sextán ára gamalt markamet fallið

Frábært gengi íslensku markaskoraranna í hollenska boltanum hefur ekki farið framhjá knattspyrnuáhugafólki, hvort sem það býr hér á landi, eða erlendis. Ísland á nú markahæsta leikmann hollensku deildarinnar og tvo af þeim þremur markahæstu. Sá þriðji er síðan í 15. sætinu og alls hafa fimm íslenskir leikmenn skorað í deildinni. Það kemur því kannski ekki á óvart að Íslandsmetið í markaskorun í erlendri deild sé fallið. Aldrei hafa verið skoruð fleiri íslensk mörk á einu tímabili á efstu deild í Evrópu.

Alfreð bætti fleiri en eitt met

Metið féll þegar Alfreð Finnbogason skoraði sitt tuttugasta mark í 3-0 sigri Heerenveen á Den Haag á laugardaginn. Aron Jóhannsson bætti við marki í fyrrakvöld.

Alfreð bætti þar með fleiri en eitt met með þessu marki því eins og kom fram í Fréttablaðinu á mánudaginn þá varð hann þarna fyrsti íslenski knattspyrnumaðurinn til að skora yfir tuttugu mörk á tveimur tímabilum.

Gamla metið var orðið sextán ára eða síðan íslenska innrásin var gerð í norsku úrvalsdeildina árið 1998.

Þá streymdu leikmenn til Noregs og margir þeirra slógu í gegn. Ríkharður Daðason fór þar fremstur en hann varð fimmti markahæsti leikmaður deildarinnar með 16 mörk í 25 leikjum með Viking. Tryggvi Guðmundsson (8 mörk fyrir Tromsö) og Helgi Sigurðsson (7 mörk fyrir Stabæk) voru einnig atkvæðamiklir og alls skoruðu níu leikmenn þessi 42 mörk.

Íslensku leikmennirnir ógnuðu þessu meti síðan tvisvar næstu tíu árin en sumrin 2002 og 2008 voru íslenskir leikmenn í norsku úrvalsdeildinni aðeins einu marki frá því að jafna metið frá 1998.

Íslenskir leikmenn í Noregi komust enn á ný inn á topp tíu listann síðasta sumar þegar 34 íslensk mörk litu dagsins ljós í norsku úrvalsdeildinni.

Yfir 30 mörkin í fimm löndum

Íslenskir leikmenn hafa rofið 30 marka múrinn í fimm löndum því auk Hollands (2 sinnum) og Noregs (8 sinnum) hafa íslenskir markaskorarar komst í 30 mörkin í Svíþjóð (2012), Danmörku (2012-13) og Belgíu (2002-03).

Frammistaða íslensku strákanna í fyrravetur var vissulega ávísun á það sem koma skal í hollensku úrvalsdeildinni í vetur. Alfreð, Kolbeinn, Aron, Jóhann Berg og Guðlaugur Victor skoruðu þá saman 38 mörk á leiktíðinni og brutu upp einokum norsku deildarinnar á topplistanum. Aron kom þá seint í deildina og Kolbeinn missti mikið úr vegna meiðsla og því mátti búast við sterku áhlaupi í ár. Sí varð líka raunin.

Metið er fallið strax í byrjun febrúar og því er nóg eftir af leikjum fyrir íslensku strákanna til þess að bæta það enn frekar. 50 marka múrinn er næstur á dagskrá. Alfreð er á góðri leið með að bæta markamet íslensks leikmanns sem hann setti í fyrra (24 mörk) og Aron Jóhannsson á möguleika á því að verða fjórði íslenski leikmaðurinn til að skora tuttugu mörk á einu tímabili í efstu deild (vantar 7 mörk). Kolbeinn Sigþórsson var líka öflugur á lokasprettinum í fyrra þegar hann hjálpaði Ajax að verða hollenskur meistari þriðja árið í röð.

Markametið í stóru deilunum

Deildirnar í Hollandi, Noregi, Belgíu, Svíþjóð og Danmörku eru allar á næsta stigi fyrir ofan íslensku Pepsi-deildina en íslenskir leikmenn hafa einnig minnt á sig á hæsta stigi.

Íslenska markametið í einni af fimm stærstu deildunum er hins vegar orðið þriggja áratuga gamalt eða síðan Atli Eðvaldsson, Ásgeir Sigurvinsson og Pétur Ormslev skoruðu saman 26 mörk í þýsku úrvalsdeildinni tímabilið 1982 til 83. Hér fyrir neðan má sjá lista yfir bestu árin í íslenskum mörkum í deildunum fimm.

Flest mörk á einu tímabili

Á Englandi

16 mörk 2001-2002

Eiður Smári Guðjohnsen skoraði 14 mörk í 32 leikjum með Chelsea

Guðni Bergsson skoraði 1 mark í 30 leikjum með Bolton

Hermann Hreiðarsson skoraði 1 mark í 38 leikjum með Ipswich

16 mörk 2011-12

Heiðar Helguson skoraði 8 mörk í 16 leikjum með Queens Park Rangers

Gylfi Þór Sigurðsson skoraði 7 mörk í 18 leikjum með Swansea City

Grétar Rafn Steinsson skoraði 1 mark í 23 leikjum með Bolton

Í Þýskalandi

26 mörk 1982-83

Atli Eðvaldsson skoraði 21 mark í 34 leikjum með Fortuna Düsseldorf

Ásgeir Sigurvinsson skoraði 4 mörk í 23 leikjum með Stuttgart

Pétur Ormslev skoraði 1 mark í 9 leikjum með Fortuna Düsseldorf

25 mörk 1985-86

Lárus Guðmundsson skoraði 10 mörk í 26 leikjum með Bayer Uerdingen

Ásgeir Sigurvinsson skoraði 9 mörk í 32 leikjum með Stuttgart

Atli Eðvaldsson skoraði 6 mörk í 30 leikjum með Bayer Uerdingen

Á Spáni

5 mörk 1985-86

Pétur Pétursson skoraði 5 mörk í 27 leikjum með Hercules Alicante

5 mörk 2006-07

Eiður Smári Guðjohnsen skoraði 5 mörk í 25 leikjum með FC Barcelona.

Í Frakklandi

25 mörk 1981-92

Teitur Þórðarson skoraði 19 mörk í 38 leikjum með Lens

Karl Þórðarson skoraði 6 mörk í 37 leikjum með Laval

14 mörk 1950-51

Albert Guðmundsson skoraði 14 mörk í 24 leikjum með Racing Paris

Á Ítalíu

2 mörk 1948-49

Albert Guðmundsson skoraði 2 mörk í 14 leikjum með AC Milan.

2 mörk 2012-13

Birkir Bjarnason skoraði 2 mörk í 24 leikjum með Pescara.