Alfreð sá eini með tvö tuttugu marka tímabil

Alfreð Finnbogason varð um helgina fyrsti íslenski knattspyrnumaðurinn sem nær að skora tuttugu mörk á tveimur tímabilum í efstu deild erlendis. Alfreð skoraði sitt tuttugasta deildarmark á leiktíðinni fyrir Heerenveen í 3-0 sigri á ADO Den Haag.

Alfreð skoraði 24 deildarmörk fyrir Heerenveen á síðustu leiktíð og setti þar markamet hjá Íslendingi í efstu deild en hann varð þá aðeins þriðji íslenski atvinnumaðurinn sem nær því að brjóta tuttugu marka múrinn.

Pétur Pétursson var stofnmeðlimur tuttugu marka klúbbsins þegar hann skoraði 23 mörk í 33 leikjum fyrir hollenska liðið Feyenoord tímabilið 1979-80.

Atli Eðvaldsson bættist í tuttugu marka klúbbinn rúmum þremur árum síðar þegar hann skoraði 21 mark í 34 leikjum með Fortuna Düsseldorf í vestur-þýsku úrvalsdeildinni 1982-83. Bæði Pétur og Atli urðu í öðru sæti á listanum yfir markahæstu leikmenn en Alfreð varð þriðji markahæstur í hollensku úrvalsdeildinni í fyrra.

Alfreð stoppaði ekki lengi í 19 mörkunum en tveir atvinnumenn voru einu marki frá því að komast í tuttugu marka klúbbinn en það voru þeir Teitur Þórðarson og Arnór Guðjohnsen.

Teitur skoraði 19 mörk fyrir Lens tímabilið 1981-82 og varð fjórði markahæsti maður deildarinnar. Arnór Guðjohnsen varð markahæsti leikmaður belgísku deildarinnar 1986-87 þegar hann skoraði 19 mörk í 34 leikjum.

Alfreð hefur nú skorað í fimm deildarleikjum í röð og aðeins mistekist að skora í 4 af 18 deildarleikjum sínum á þessu tímabili. Mark hans á laugardaginn kom úr víti en 7 af þessum 20 mörkum hans í vetur hafa komið af vítapunktinum.

Alfreð er markahæstur í hollensku deildinni eins og hann hefur verið nær allt tímabilið. Hann er nú með fjögurra marka forskot á Graziano Pellè hjá Feyenoord.

Hér fyrir neðan má sjá bestu markatímabil íslenskra leikmanna í efstu deild í Evrópu en Aron Jóhannsson, sem hefur þegar skorað 12 mörk fyrir AZ Alkmaar á tímabilinu, á góða möguleika á því að komast á listann.

Flest mörk hjá íslenskum leikmanni í evrópskri deild:

24 mörk

Alfreð Finnbogason Heerenveen, Hollandi 2012-13

23 mörk

Pétur Pétursson Feyenoord, Hollandi 1979-80

21 mark

Atli Eðvaldsson  ortuna Düsseldorf, Vestur-Þýskalandi 1982-83

20 mörk

Alfreð Finnbogason Heerenveen, Hollandi 2013-14

19 mörk

Arnór Guðjohnsen, Anderlecht, Belgíu 1986-87

Teitur Þórðarson, Lens, Frakklandi 1981-82

18 mörk

Arnar Grétarsson, Lokeren, Belgíu 2002-03

Veigar Páll Gunnarsson, Stabæk, Noregi 2006

17 mörk

Ríkharður Daðason, Viking, Noregi 1999

Gunnar Heiðar Þorvaldsson, Norrköping, Svíþjóð 2012

16 mörk

Gunnar Heiðar Þorvaldsson, Halmstad, Svíþjóð 2005

Heiðar Helguson, Lilleström, Noregi 1999

15 mörk

Tryggvi Guðmundsson Tromsö, Noregi 2000

Tryggvi Guðmundsson Stabæk, Noregi 2002

Ríkharður Daðason, Viking, Noregi 1998

Ríkharður Daðason, Viking, Noregi 2000

Sigurður Grétarsson, Luzern, Sviss 1985-86

Kolbeinn Sigþórsson, AZ Alkmaar, Holland 2010-11

Veigar Páll Gunnarsson, Stabæk, Noregi 2007