Nær milljarður reykir daglega

Nærri milljarður jarðarbúa reykir daglega samkvæmt samantekt bandarísks læknatímarits sem vitnað er til á fréttavef BBC.

Fjöldi reykingarmanna hefur aukist á undanförnum áratugum þó hlutfallið dragist saman. Ástæðan er gríðarleg fólksfjölgun í heiminum.

Um 967 milljónir manna reyktu daglega á árinu 2012 samanborið við 721 milljón árið 1980. Tæplega 19 prósent jarðarbúa reykja nú, samanborið við nærri 26 prósent árið 1980.

Hæst hlutfall reykingarmanna í heiminum má finna á Austur-Tímor, þar sem 61 prósent landsmanna reykja daglega. Hlutfallið er lægst á eyjunum Antígva og Barbúda, 5 prósent.

Jarðarbúar reyktu um 6.250 milljarða sígaretta árið 2012, samanborið við 4.960 milljarða árið 1980.