Segir Rússa ekki vera einangraða vegna Úkraínu

Vladimír Pútín Rússlandsforseti kennir Vesturlöndum um versnandi samskipti þeirra og Rússa frá upphafi Úkraínudeilunnar og segir að rússnesk stjórnvöld muni ekki leyfa sjálfum sér að einangrast á alþjóðlegum vettvangi handan annars „Járntjalds“.

Pútín segir í viðtali við rússneska ríkisfjölmiðilinn TASS að viðskiptaþvinganir Vesturlanda gegn Rússum, veiking rúblunnar og lækkandi heimsmarkaðsverð á olíu muni ekki hafa neinar „hörmulegar afleiðingar í för með sér fyrir rússneskan efnahag“.

Bandaríkin, aðildarríki Evrópusambandsins og fleiri ríki hafa beitt Rússum viðskiptaþvingunum vegna innlimunar þeirra á Krímskaga og stuðnings rússneskra stjórnvalda við aðskilnaðarsinna í austurhluta Úkraínu.

„Við skiljum það ólán sem „Járntjald“ hefði í för með sér fyrir okkur. Við munum ekki feta þá braut og enginn mun reisa vegg í kringum okkur. Það er ómögulegt,“ sagði Pútín.

Í frétt Reuters kemur fram að Pútín segi að um leið og rússnesk stjórnvöld byrji að verja hagsmuni sína sé það slæmt í huga Vesturlanda. „Heldur þú að þetta sé vegna afstöðu okkar í málefnum Úkraínu eða Krím? Engan veginn. Ef það væri ekki vegna þeirra mála þá hefðu þeir fundið einhverja aðra ástæðu. Þannig hefur þetta alltaf verið.“