Giggs: Van Gaal heldur í United-hefðina

Ryan Giggs er ánægður með það hvernig knattspyrnustjórinn Louis van Gaal stýrir liði Manchester United og þá sérstaklega hvernig hann heldur í hefðina hjá United að taka unga leikmenn inn í aðalliðið.

Louis van Gaal er búinn að kaupa dýra stjörnuleikmenn eins og þá Angel di Maria, Radamel Falcao, Marcos Rojo og Ander Herrera en hann hefur einnig leyft ungum leikmönnum að spila á sínu fyrsta tímabili á Old Trafford.

„Þú notar peningana til þess að kaupa heimsklassa leikmenn en þú gefur einnig ungum leikmönnum tækifæri til að koma upp," sagði Ryan Giggs við Fourfourtwo.

Leikmenn eins og þeir Tyler Blackett (20 ára) og Paddy McNair (19) hafa spilað sína fyrstu leiki með aðalliði Manchester United á þessu tímabili.

„Þetta er heimspekin hjá Manchester United. Þú verður að ala upp unga leikmenn," sagði Ryan Giggs. Hann veit líka manna best að stuðningsmennirnir krefjast þess og félagið þarf á því að halda.

„Svona hefur United alltaf gert þetta og svona mun United alltaf gera hlutina," segir Giggs.

Giggs veit líka að á næstu vikum fær Manchester United mörg stór próf á stuttum tíma enda eru framundan leikir við Chelsea, Manchester City og Arsenal en fram að þessu hefur liðið verið að spila við „minni" lið ensku úrvalsdeildarinnar.

„Þetta verða góð próf fyrir okkur til að sjá hvar við stöndum. Við erum tilbúnir í þessa áskorun," sagði Giggs.