Myndband sýnir þegar keyrt er á konu á Abbey Road-gangbrautinni

Myndband af slysi sem varð við gangbrautina á Abbey Road í London sýnir hvar kona hleypur yfir gangbrautina en verður fyrir bíl.

Slysið varð í júlí 2012 en myndband úr eftirlitsmyndavél var sett á netið fyrir fjórum dögum. Þar sést þegar konan hleypur út á götu og bíllinn keyrir á hana. Bíllinn fer úr mynd en stoppar og vegfarendur drífur að til þess að aðstoða konuna.

Ekki er vitað hversu mikið konan slasaðist en lögreglan í London fer nú yfir málaskrá sína til að athuga hvort að slysið hafi verið tilkynnt.

Gangbrautina á Abbey Road þekkja flestir, eða að minnsta kosti þeir sem þekkja Bítlana. Plötuumslag Bítlaplötunnar Abbey Road er einmitt mynd af hljómsveitarmeðlimum þar sem þeir labba yfir umrædda gangbraut.