Þýskaland þarf ekki að greiða innflytjendum frá öðrum ESB-ríkjum bætur

Evrópudómstóllinn hefur úrskurðað að Þýskaland megi synja ríkisborgurum frá öðrum ríkjum Evrópusambandsins um bætur ef viðkomandi hefur aldrei unnið í Þýskalandi, en er engu að síður búsettur þar.

Í frétt Guardian um málið er sagt að úrskurðurinn marki tímamót og geti haft mikið fordæmisgildi fyrir önnur ESB-lönd. Samkvæmt úrskurðinum þarf Þýskaland ekki að greiða innflytjendum frá ESB atvinnuleysisbætur ef viðkomandi hefur ekki verið virkur á vinnumarkaði síðan hann kom til landsins.

Upphaf málsins má rekja til þess að Elisabeta Dano, 25 ára gömul kona frá Rúmeníu, sem bjó í Leipzig, var synjað um atvinnuleysisbætur.

Vinnumálastofnun í borginni taldi ekki sannað að Dano, sem hafði búið í Þýskalandi frá árinu 2010, hefði einhvern tímann leitað sér að vinnu í landinu eða haft vinnu þar. Því hefði hún ekki átt rétt á bótum. Evrópudómstóllinn hefur nú staðfest það.