HM-Uppbótartíminn: Samningslausi markvörðurinn sló í gegn

Annarri umferð Heimsmeistaramótsins lauk í gærkvöldi með jafntefli Bandaríkjanna og Portúgals. Hverjir áttu góðan dag og hverjir áttu erfiðan dag? Vísir mun gera upp umferðina á léttum nótum í dag.

Góð umferð fyrir...

Guillermo Ochoa, Mexíkó

Guillermo Ochoa  er samningslaus eftir að hafa kvatt Ajaccio í frönsku úrvalsdeildinni í vor eftir að klúbburinn féll úr efstu deild. Það virtist engin áhrif hafa á Ochoa sem hefur verið sem klettur í marki Mexíkó í upphafi móts. Ochoa var valinn maður leiksins í leik Mexíkó gegn Brasilíu og var það ekki af ástæðulausu. Brasilíumenn áttu nokkrar góðar tilraunir, sennilega enga betri en fastan skalla frá Neymar en Ochoa var vel á verði í markinu og tryggði Mexíkó eitt stig.

Leikmenn Kosta Ríka

Aðra umferðina í röð komu leikmenn Kosta Ríka öllum á óvart. Kosta Ríka átti aðeins að vera fallbyssufóður í vegi Englands, Úrúgvæ og Ítalíu í dauðariðlinum á HM. Leikmenn liðsins hafa hinsvegar komið öllum á óvart í riðli sem inniheldur þrjá fyrrverandi Heimsmeistara. Bryan Ruiz sem gekk til liðs við PSV á láni frá Fulham um áramótin skoraði sigurmarkið gegn Ítölum sem tryggði sæti Kosta Ríka í 16-liða úrslitum. Enginn átti von á slíku og getur Jorge Luis Pinto, þjálfari liðsins hvílt helstu stjörnur liðsins gegn Englendingum á morgun í leik sem skiptir engu máli enda eru Englendingar á leiðinni heim.

Divock Origi, Belgíu

Divock Origi hefur slegið í gegn í stjörnu prýddu liði Belgíu í upphafi móts. Origi á að baki 21 leik fyrir Lille í frönsku úrvalsdeildinni þar sem honum hefur aðeins einu sinni tekist að finna netmöskvana. Það kom á óvart þegar Marc Wilmots valdi hann í lokahóp belgíska liðsins fyrir mótið en hann tók sæti Christian Benteke sem meiddist í vor. Var gengið svo langt að tala um að Wilmots hefði tekið hann í þeim tilgangi þess að hann væri bundinn belgíska liðinu en knattspyrnusamband Kenýu hafði haft samband við Origi. Origi hefur byrjað á varamannabekk Belgíu í báðum leikjum liðsins hingað til en komið inn fyrir arfaslakan Romelu Lukaku og uppskar sitt fyrsta landsliðsmark með sigurmarkinu gegn Rússlandi.

Jorge Sampaoli, þjálfara Chile

Chile vann fyrsta leik riðlakeppninar eftir smá hark gegn Ástralíu en sýndu styrk sinn í leiknum gegn Spánverjum. Spánverjar vissu að allt annað en sigur myndi gera út um vonir þeirra á Heimsmeistaramótinu. Sigur Chile var hinsvegar öruggur en liðið komst í 2-0 í fyrri hálfleik og sigldi öruggum sigri heim í seinni hálfleik. Chile var ekki talið sigurstranglegt fyrir mótið en hefur sýnt gríðarlega skemmtilega takta í upphafi móts og vilja eflaust mörg lið forðast Chile í 16-liða úrslitunum.

...Erfið umferð fyrir

Leikmenn Kamerún

Stuttu áður en mótið hófst neituðu liðsmenn Kamerún að fara um borð í flug fyrr en deilumál um bónusgreiðslur til þeirra væru leyst. Má segja að þar hafi ævintýrið byrjað hjá liðinu sem vill eflaust gleyma mótinu sem fyrst. Spilamennskan í fyrsta leiknum gegn Mexíkó var slök en leikmennirnir urðu sér til skammar gegn Króatíu. Alex Song, reynslumesti leikmaður liðsins, fékk rautt spjald fyrir að gefa Mario Mandzukic olnbogaskot í bakið. Benoit Assou-Ekotto, annar af reynslumeiri leikmönnum liðsins, réðst á liðsfélaga sinn í 4-0 tapi. Leikmenn liðsins sýndu margir sínar verstu hliðar og er ekkert sambærilegt með liðinu sem tekur þátt í ár og liðinu sem komst í átta liða úrslit árið 1990.

Peter O'Leary

Bosnía Herzegovína tók í fyrsta sinn þátt á lokakeppni Heimsmeistaramótsins í knattspyrnu en ljúka keppni eftir riðlakeppnina. Það var ljóst eftir að liðið tapaði naumlega fyrir Nígeríu á laugardaginn. Edin Dzeko kom boltanum í netið fyrir Bosníu í fyrri hálfleik en var ranglega dæmdur rangstæður þrátt fyrir að vera langt fyrir innan línuna. Gríðarlega svekkjandi fyrir Bosníumenn sem hefðu verið í fínum málum fyrir lokaleik riðilsins hefði leikurinn endað með jafntefli.

Spánverja

Spánverjar eru ríkjandi Heims- og Evrópumeistarar en voru einfaldlega slakir gegn Chile á miðvikudaginn. Þrátt fyrir að þurfa á sigri að halda vantaði allan eldmóð í leik Spánverja. Aðalsmerki liðsins, að halda boltanum var ekki til staðar og var liðið aðeins 56% með boltann í leiknum. Eftir tapið er ljóst að Spánverjar eru á leiðinni heim með skottið á milli lappana.