Svíþjóðardemókratarnir hafa því náð að bæta við sig nærri fimm prósentum með því að höfða til ótta almennings við útlendinga.
Enginn hinna flokkanna hefur samt minnsta áhuga á að fá þá í stjórnarsamstarf með sér, þannig að þessi sigur hefur fyrst og fremst þau áhrif að torvelda öðrum flokkum að mynda meirihlutastjórn.
Kosningavaka flokksins í Malmö var haldin í húsnæði KFUM í kvöld, en formaður KFUM frétti ekki af því fyrr en um kvöldið og brást við með því að taka rafmagnið af húsinu og kveikja á brunabjöllum.
Félagar flokksins héldu engu að síður áfram með fundinn, í myrkri og hávaða, en hleyptu ekki blaðamönnum inn.

Vinstri flokkarnir þrír vinna hins vegar engan afgerandi sigur, því þótt þeir séu komnir með nærri 45 prósent atkvæða þá eru þeir ekki að bæta við sig nema um einu prósenti samanlagt.
Útgönguspár bentu til þess að flokkur femínista, Femínistafrumkvæðið, myndi í fyrsta sinn skríða yfir 4 prósenta lágmarkið og ná manni inn á þing. Það gekk þó ekki eftir.
Reinfeldt hefur verið forsætisráðherra í tvö kjörtímabil, heil átta ár, og þykir hafa staðið sig býsna vel í efnahagsmálum. Ekki er því að sjá að kjósendur hafi verið að refsa honum fyrir neitt sérstakt, heldur skýrist niðurstaðan frekar skýrast af því að kjósendur séu hreinlega orðnir leiðir á honum.
Annars vekur athygli hve fylgistölurnar hafa í raun lítið breyst frá kosningunum fyrir fjórum árum. Breytingar á fylgi flokkanna eru innan við tvö prósent, að undanskildum Moderaterna sem tapar nærri sjö prósentum og Svíþjóðardemókrötum sem vinna rúmlega sjö prósent.
Niðurstaðan úr sænsku kosningum hlýtur meðal annars að vera harla leiðinleg fyrir David Cameron, forsætisráðherra Bretlands, en Reinfeldt hefur verið helsti bandamaður Camerons innan Evrópusambandsins.
Löfven er á hinn bóginn í góðum tengslum við Ed Miliband, leiðtoga bresku stjórnarandstöðunnar, enda báðir sósíaldemókratar.