Missti vinnuna fyrir að fylla á gosið sitt

Iðnaðarmaður sem vann við lagfæringar á ríkisspítalanum í North Charleston í fylkinu South Carolina í Bandaríkjunum missti vinnuna og fékk tæplega sextíu þúsund króna sekt fyrir að fylla á gosið sitt.

Iðnaðarmaðurinn, sem heitir Christopher Lewis, var að borða í matsal spítalans og ætlaði sér að ná sér í áfyllingu á gosið sitt – sem er yfirleitt ókeypis í Bandaríkjunum. En á spítalanum kostar áfyllingin 89 cent, sem eru um 100 íslenskar krónur. Lögreglumaður  var staddur í matasalnum og varð vitni af þessari áfyllingu iðnaðarmannsins. Þarna taldi lögreglumaðurinn að Lewis hafi framið glæp og sektaði hann um 525 dali, sem eru rétt tæpar sextíu þúsund krónur. Þetta gerðist í vikubyrjun.

Til að bæta gráu ofan á svart var Lewis bannað að koma aftur á spítalann, sem þýddi að hann gat ekki mætt í vinnuna.

Lewis reyndi að tala lögreglumanninn – sem reyndar er yfirmaður lögreglunnar í borginni – eitthvað til. En ekkert gekk.

„Ég spurði hvort ég mætti mæta í vinnuna með nesti og sniðganga matsalinn. En það mátti ég ekki,“ útskýrði Lewis í samtali við WISTV fréttastofuna stuttu eftir atburðinn.

Lewis viðurkenndi að hafa aldrei borgað fyrir áfyllinguna – hann hafi einfaldlega ekki tekið eftir því að hún kostaði eitthvað. „Ég trúi því ekki að ég hafi gert þessi mistök – ekki borgað 100 krónur og það kostað mig sextíu þúsund,“ sagði Lewis ennfremur.

Yfirmenn spítalans gáfu frá sér yfirlýsingu vegna málsins. Í henni styðja þeir aðgerðir lögreglunnar. „Þjófnaður er glæpur,“ segir meðal annars í yfirlýsingunni. Þar kemur fram að Lewis hafi verið sektaður fyrir að hafa ítrekað fyllt á gosið sitt án þess að borga. Honum er tjáð að hann geti skotið málinu til dómstóla.

Athygli vakti að talsmaður spítalans taldi gosáfyllinguna vera „þjófnað á eigum ríkisins“.

Málið hefur vakið hörð viðbrögð vestanhafs. Lögreglan hefur verið gagnrýnd fyrir óþarfa hörku og alltof háa sekt. Lögregluyfirvöld brugðust vel við kvörtunum almennings og í gær var ákveðið að sleppa sektinni – iðnaðarmaðurinn Lewis fékk eingöngu viðvörun. Ekki liggur þó ljóst fyrir hvort Lewis megi ennþá mæta í vinnuna.