Óreyndur stýrimaður var við stjórn þegar ferjan sökk

Skipstjóri Suður-Kóresku ferjunnar sem sökk í apríl hefur viðurkennt að óreyndur stýrimaður hafi verið við stjórn ferjunnar þegar hún sökk. Rúmlega 300 manns létust í slysinu og þar af mest skólabörn.

Hann bar nýverið vitni í fyrsta sinn og þá neitaði hann því að hafa verið að spila tölvuleiki í síma sínum þegar vandræðin byrjuðu og halli kom á skipið. Skipstjórinn Lee Joon-Seok hefur verið ákærður, ásamt þremur öðrum háttsettum áhafnarmeðlimum, fyrir morð af vanrækslu sem er refsanlegt með dauða í Suður-Kóreu.

Þar að auki hafa ellefu áhafnarmeðlimir verið ákærðir fyrir önnur afbrot. Þetta kemur fram a vef Guardian.

Skipstjórinn og áhöfnin var á sínum tíma harðlega gagnrýnd fyrir að yfirgefa skipið á meðan hundruðir manna voru enn fastir um borð.

Rannsóknarnefnd tilkynnti í gær niðurstöður sínar úr rannsókn á tildrögum slyssins. Nefndin segir að samspil þess að skipið hafi verið ofhlaðið, því hafi verið breytt á ólöglegan hátt og mannleg mistök hafi valdið slysinu.

Þegar skipstjórinn var spurður hvort að hann hefði ekki átt að taka yfir stjórn ferjunnar þegar henni var siglt inn í sund, sem þekkt sé fyrir sterka strauma, sagði hann: „Jú, ætli það ekki.“ Þegar skipið tók mjög krappa beygju byrjaði það að halla á aðra hliðina. Það olli því að farmur færðist til í lest skipsins svo ekki var hægt að rétta skipið af.

Lee segir eigendur skipsins bera ábyrgð á slysinu þar sem þeir hafi ákveðið að ofhlaða ferjuna og að það hafi verið gert reglulega.