Þingkona ósátt við sérstakt stelpuspil: „Díses Kræst!“

Þingkona Framsóknarflokksins, Jóhanna María Sigmundsdóttir, birtir skjáskot af mbl.is á Facebook-síðu sinni þar sem sjá má auglýsingu fyrir spilið Party og co: Stelpur. Lætur hún fylgja með eftirfarandi texta:

„Leyfi mér að sletta hérna "díses kræst!"

Er ekki árið 2014 ? Hver sigurinn í kvennréttindabaráttunni á fæti öðrum og svo koma auglýsingar á vefmiðlum, eins og mbl.is í dag um spil sem er sérstaklega hannað fyrir stelpur.

Hvernig eru spurningarnar í þessu spili, ýta þær undir fjölbreytileika kvenkyns einstaklinga og hvetja til að brjótast úr mynstri hins staðlaða ? Geta strákar spilað það? Eru allar stelpur eins og því svona auðvelt að skella bleikum kassa í búðir og ætlast til að aðeins annað kynið kaupi og/eða notist við vöruna ?“

Fyrir um mánuði síðan vöktu einmitt myndir af völdum spurningum úr spilinu athygli á Facebook.

Ýmsum þótti þá sumar spurningarnar ýta undir ósanngjarnar útlitskröfur til kvenna, en meðal annars þurfa keppendur að svara því hvaða fatamynstur lætur mann „líta út fyrir að vera grennri“. Þá er hægt að velja á milli lóðréttra randa, láréttra randa og ferninga.

Einnig er í spilinu spurt um íslenskt heiti fyrirbærisins „cellulite“ en það er appelsínuhúð.

Samkvæmt upplýsingum um Party og co: Stelpur á vefsíðunni Nordic Games, er það ætlað stúlkum á aldrinum átta til fjórtán ára. Það er auglýst sem „tilvalið vinkonuspil“ með spurningum um „tísku, tómstundir, menningu og fegurð.“

Post by Hanna María Sigmundsdóttir.