Mótmælt við lögreglustöðina á Ísafirði í dag

„Það gekk ótrúlega vel og það komu fleiri en ég nokkurn tíman bjóst við,“ segir Halldóra Sigrún Ásgeirsdóttir, einn skipuleggjanda mótmælanna á Ísafirði. Mótmælt var við lögreglustöðina á Ísafirði í dag og var tilefnið framganga lögreglu nýverið við handtöku manns sem var í sjálfsmorðshugleiðingum.

Mótmælin stóðu yfir í um tuttugu mínútur og tæplega tuttugu mótmælendur komu að þeim. Hlynur H. Snorrason, yfirlögregluþjónn, ræddi við mótmælendur.

„Hann gat nú ekki gefið okkur mikið af upplýsingum og svaraði svona frekar illa. Mér fannst þó gott að hann kom út og þakkaði okkur fyrir að koma,“ segir Halldóra.

Hún segist hafa heyrt frá fólki í dag, sem þorði ekki að mæta á mótmælin þar sem þau kæmu að málum á borði lögreglu og héldu að mögulega myndi það hafa áhrif á gang málanna.

„Fólk getur ekki setið á sér lengur, en það getur heldur ekki staðið upp. Það er mjög slæmt.“

Halldóra segir að til standi að halda önnur mótmæli í janúar verði tilefni til.

„Ef það breytist ekkert og við sjáum að ekki sé verið að taka á málunum. Að einhver fái dóm fyrir eitthvert af þeim málum sem hafa komið fram, sé vikið úr starfi eða bara eitthvað. Þá munum við halda önnur mótmæli í janúar.“