„Klæðið ykkur eins og þið ættuð virðingu skilið, ekki pláss við bar“

Elizabeth Lauten, sem er aðstoðarkona þingmannsins Stephen Fincher, sem situr á þingi fyrir Repúblikana, gagnrýndi dætur Barack Obama. Hún gerði út á fatnað þeirra þegar þær birtust í sjónvarpi ásamt föður sínum og sagði þær áhugalausar um veru sína í Hvíta húsinu.

Lauten varð fyrir mikilli gagnrýni og hefur nú beðist afsökunar samkvæmt BBC.

Gagnrýnina setti hún fram á Facebook, en eftir að færsla hennar hafði dreifst víða um á netinu eyddi hún henni. Lauten hefur verið gagnrýnd harðlega á samfélagsmiðlum fyrir færsluna.

„Kæru Sasha og Malia, ég átta mig á því að þið eruð báðar á þessum hræðilegu unglingsárum, en þið eru meðlimir forsetafjölskyldunnar, reynið að sýna smá klassa. Í það minnsta ættuð þið að virða það hlutverk sem þið leikið,“ stóð í færslunni.

Þá gerði hún einnig lítið úr fordæmi foreldra þeirra og sagði að þær ættu að haga sér eins og það að vera í Hvíta húsinu væri þeim mikilvægt.

„Klæðið ykkur eins og þið ættuð virðingu skilda, ekki pláss við bar.“

Í afsökunarbeiðni sinni segir Lauten að eftir að hafa beðið til guðs í marga klukkutíma, rætt við foreldra sína og endurlesið það sem hún skrifaði, sé henni ljóst hve særandi orð hennar voru. Þá sagðist hún hafa lært af þessari reynslu.