Ofurhugi gekk á línu milli skýjakljúfa í Chicago

Þúsundir manna fylgdust agndofa með þegar bandaríska ofurhuganum Nik Wallenda tókst að klára tvær göngur á línu í mikilli hæð í borginni Chicago í gær. Wallenda var hvorki með öryggisnet eða beisli.

Hinn 35 ára Wallenda byrjaði á því að ganga á brattri línu milli tveggja skýjakljúfa sitt hvoru megin við Chicago-ána. Að því loknu gekk hann á línu milli Marina City turnanna með bundið fyrir augun.

Í frétt BBC segir að Wallenda hafi klárað fyrri gönguna á sex mínútum og 52 sekúndum þar sem hann línan var í 152 metra hæð og vindur mældist um 11 metrar á sekúndu.

Síðar kláraði hann um 29 metra göngu milli Marina City turnanna tveggja á einni mínútu og 17 sekúndum.

Göngur Wallenda voru sýndar beint í sjónvarpi, þó með 10 sekúndna seinkun ef ske kynni að hann myndi detta af línunni.

Wallenda er margreyndur á þessu sviði og hefur þegar gengið á línu yfir Níagarafossa og og Miklagljúfur svo eitthvað sé nefnt.