Norðmenn hafa ekki efni á því að gera eins og Íslendingar

Norska ríkissjónvarpið, NRK, hefur verið duglegt síðustu daga að fjalla um íslenska knattspyrnu.

Norðmenn eru að reyna að átta sig á því hvernig Íslendingar fóru að því að verða besta fótboltaþjóðin á Norðurlöndunum.

NRK fór á Akranes á dögunum og skoðaði hvernig það litla bæjarfélag færi að því að framleiða svona mikið af góðum knattspyrnumönnum.

Rætt var við Arnór Sigurðsson, fimmtán ára efnilegan knattspyrnukappa af Skaganum, sem norska ríkisútvarpið segir lýsandi fyrir hugsanahátt ungra iðkenda í bæjarfélaginu sem telur á sjöunda þúsund íbúa. Draumur hans sé að spila í ensku úrvalsdeildinni eins og hjá svo mörgum.

„Stundum dreymir mig um fótbolta á nóttunni. Þá skora ég síðasta markið í heimasigri Arsenal á Emirates.“

Nú fjallar NRK um þjálfun á Íslandi og bendir á að Íslendingar séu með menntaða þjálfara á launum niður í yngstu aldursflokki. Norðmenn segjast ekki hafa efni á því.

„Ef þú ert fjögurra eða fimm ára gamall og vilt spila fótbolta fært þú bæði menntaðan og launaðan þjálfara frá fyrsta degi,“ segir Arnar Bill Gunnarsson, fræðslustjóri KSÍ við NRK. Kollegi hans í Noregi segir að samfélagið ytra hafi einfaldlega ekki efni á að bjóða upp á slíka þjónustu. Kostnaðurinn yrði jafnvirði á þriðja tug milljarða íslenskra króna.

Í Noregi eru það foreldrar sem þjálfa yngstu börnin og Norðmenn ætla að reyna að mennta þá betur í þjálfarafræðunum.