Vilja styttu af kölska fyrir utan þinghúsið

Hópur satanista í Oklahoma City í Bandaríkjunum hefur birt teikningu af rúmlega tveggja metra hárri styttu af kölska sem þeir vilja að verði reist við þinghúsið þar í borg.

Satanistarnir hafa lagt inn formlega umsókn til nefndar um úthlutun staðsetningar fyrir styttuna, en hún sýnir myrkrahöfðingjann í líki geitar með horn, vængi og langt hökuskegg. Hann situr í hásæti með brosandi börn sér við hlið.

„Minnisvarðinn var hannaður með það í huga að endurspegla lífsskoðanir satanista í borginni og víðar,“ segir talsmaður hópsins, og bætir hann því við að styttan muni einnig nýtast sem stóll þar sem fólk á öllum aldri geti setið í kjöltu skrattans og fengið þannig innblástur.

Hópurinn hefur safnað næstum helmingi þeirra 20 þúsund Bandaríkjadala sem það kostar að reisa minnisvarðann, og bíður nú svars frá nefndinni.