Um sjötíu manns létu lífið þegar bátur afrískra flóttamanna, aðallega Eþíópíumanna, sökk við strendur Jemen í gær. Jemensk yfirvöld segja að báturinn hafi sokkið vegna ofsaveðurs og ólgusjós.
BBC greinir frá. Á hverju ári reyna tugþúsundir manna að komast yfir Rauðahafið frá austurströnd Afríku til Jemen og hundruð láta lífið á leiðinni. Oft reiðir fólkið sig á hrörlega báta eða fleka.
Flóttamannastofnun Sameinuðu þjóðanna greindi frá því í október að rúmlega tvöhundruð manns hefðu látist á árinu við að reyna að komast til Jemen.
Sjötíu flóttamenn látnir eftir að bát hvolfdi
