Nítján ára bið Aberdeen á enda

Í dag lauk 19 ára langri bið Aberdeen eftir titli, þegar liðið lagði Inverness í úrslitaleik skoska deildarbikarsins eftir vítaspyrnukeppni.

Leikurinn, sem fór fram á Celtic Park, var nokkuð fjörugur þótt mörkin hefðu látið á sér standa. Hvorugu liðinu tókst að skora í venjulegum leiktíma og framlengingu og því réðust úrslitin í vítaspyrnukeppni.

Þar skoruðu leikmenn Aberdeen úr fjórum spyrnum á meðan leikmönnum Inverness láðist aðeins að skora úr tveimur. Aberdeen fagnaði því sínum fyrsta titli síðan liðið varð deildarbikarmeistari í nóvember 1995.

Aberdeen átti sinn blómatíma á fyrri hluta 9. áratugarins þegar Sir Alex Ferguson var við stjórnvölinn hjá liðinu. Undir stjórn Ferguson vann Aberdeen m.a. skosku deildina í þrígang, skoska bikarinn fjórum sinnum, auk þess sem liðið fagnaði sigri í Evrópukeppni bikarhafa vorið 1983.

Aberdeen situr í 2. sæti skosku úrvalsdeildarinnar, 24 stigum á eftir toppliði Celtic, á meðan Inverness er í 5. sæti.