Monaco rak Ranieri

Ítalinn Claudio Ranieri er enn eina ferðina í atvinnuleit. Að þessu sinni var hann rekinn frá franska félaginu AS Monaco.

Þessi 62 ára þjálfari tók við liðinu árið 2012 og kom liðinu upp í úrvalsdeild í fyrstu tilraun. Síðan spanderaði félagið stjarnfræðilegum upphæðum í leikmenn eins og Radamel Falcao og Joao Moutinho.

Monaco varð í öðru sæti í frönsku deildinni á eftir öðru nýríku félagi - PSG. Ranieri og félagar voru níu stigum á eftir PSG og það þótti ekki nógu gott.

"Þetta var erfið ákvörðun en við teljum okkur þurfa nýjan kraft núna," sagði íþróttastjóri félagsins, Vasim Vasilyev.

Leonardo Jardim, þjálfari Sporting Lisbon, er talinn líklegur arftaki Ranieri.