Slóð klámsíðu fór óvart í fréttirnar

Heldur óheppilegt atvik átti sér stað í útsendingu fréttastöðvar í Chicago í umfjöllun um nýtt app fyrir farsíma. Í stuttu myndbroti mátti sjá starfsmann stöðvarinnar leita að appinu í farsíma sínum en þegar hann sló inn fyrstu stafina í nafni appsins kom upp slóð inn á klámsíðu sem vistast hafði í minni símans.

Glöggur notandi vefsíðunnar Reddit kom auga á slóðina og hóf umræðu um atvikið á síðunni. Í kjölfarið var sjónvarpsfréttinni eytt út af vefsíðu sjónvarpsstöðvarinnar. En internetið gleymir engu og hefur myndbandið því farið víða.

Í frétt Daily Mail segir að algengt sé að fréttastöðvar noti farsíma starfsmanna sinna í fréttum, en þessi tiltekni starfsmaður kunni líklega ekki að eyða vefslóðum úr minninu í síma sínum.